Diin gid bala padulong ining henerasyon?

Ako natawo sa isa ka masalimu-ot nga sitwasyon sang pangabuhi. Sa aboy-aboy ako ginpamuklat sang akon ginikanan, nga ang pangabuhi diri sa kalibutan napun-an sang magagmay kag dalagku nga pagtilaw.

Sa akon pagdaku, ulan kag init ginbatas, agud ma-angkon ang edukasyon nga buot ni nanay kag ni tatay ipamanggad sa akon. Gutang sa teel ko medya pulgada na ang kadamulon. Sa pagbugtaw ko sa ka-agahon, asin kag dukot ang naga-maayong aga sa akon, kag sa gab-i naman ay nagasiling, " ari naman ako, asin kag dukot. Kauna ako, indi lang pagtuluka."

Siling ni nanay ang tawo palareho sa mata sang Diyos. Ti, nga-a nakuha niya gani magtulok sa tawo nga palareho bisan pa sa iya pagkagamhanan kag pagka-diyos? Ti, ang tawo ya nga-a indi? Palamangkutanon nga nagsulod sa paminsaron ko.

Sa talunsay nga pagsayasat kag pagpanglugayahon, naladlad ang akon mata sa imoralidad, kasakon sang tawo, pagkamapiguson kag mapangahason.

Diin gid bala padulong ining henerasyon, pag-asa sang banwang tinubuan?

Sa bulutho-an ako gintudluan nga mahal ang kabuhi sang tawo. Kinahanglan halungan kay isa lang ini. Apang sa aso sang tabako ni Sir ako na-engganyo. Kag sa amyon sang lawas niya nga may alkohol , laway ko nagtulo. Dalan niya akon ginbagtas. Nakahibalo kun ano kag sa diin kuhaon yadtong butang. Droga nangin ordinaryo para sa akon. Sing-al ni nanay daw lagabong sang drum ni Bon Jovi ang akon pamatyag.

Nahublas sa akon lamharon nga panghunan-huna ang katahum sang kabuhi kun ara ikaw sa kalibutan. Babahe pwede na lang baklon sa manubo nga kantidad. Plaza, naga-angkon kabuhi kon ang ining mga bulak magsab-og sang ila kahumot.

Nagmadmad kag natapungawan ako. Kinahanglan ko pa bala dugangan ang tap-ing sang kalibutan? Diin ayhan ako pakadto?

Sa akon pagdulog ginbinag-binag ang tanan.  

Tsk! Tsk! Tsk!

Gago ako para iduso ang kalaglagan sang kalibutan kag kalaglagan ko man.

Ako nakabugtaw na. Apang basura nga nagapangamyon padayon sa pagtaas. Manugpakilimos sang akon piso nagahulat. Kalbo sa bukid nagalapad. Ekonomiya nga nagahuyango. Ang aton nasyon indi na masarangan bangunon. Imoralidad ginapabakod. Sobra na! Daw masuka na ako. Kinahanglan sa aton pagbag-o.

Bitbit ang akon kwaderno, nagpadulong sa buluthuan. Handa ipabutyag ang kamatu-oran nga nakita. Buot ipa-intyende nga responsibilidad sa kaugalingon kag isig-katawo kinahanglan hatagan sang pagtamod.

Subong na tani ang tion sang akon pagbag-o. Apang welga sila ni Ma'am kag ni Sir, upod ang iban nga mga estudyante. Sa akon pagsulod sa buluthuan, ako gin-singgitan... " indi kinahanglan mag-eskwela kay wala pulos ining institusyon!" Rawit sang laway ni Ma'am tungod sang pamuyayaw daw pitik sa akon dulunggan. 

"Education is a right, not a privilege!" English nga natun-an man sa apat ka dingding sang klasehan. May kamatu-oran. Isa ka pagpamuklat. Isa kag isa nagasinggit sang ila kinamatarong.

Karon, kinahanglan siyasaton. Tal-os bala ang kagamhanan sining edukasyon? Tawo mismo among may binuhatan nga sa padayon amo man ang magapapas sang iya lahi. Kag magapapas sining kalibutan.

Ako natawo sa isa ka masalimu-ot nga kalibutan. Bu-ot kuntani makakita sang masanag nga buwas damlag... produkto sang mahal nga edukasyon, sa pagdulom sang kalibutan daku nga rason. Diin gid bala makit-an ang pagkamatinutud-on sang tawo? Diin gid kun magpadayon ining kabuangan? Sabat sang tawo nga may tinun-an!

#BLOG