Panibagong set ng mga pangalan ng mga media personalities na umano'y nakinabang kay Janet Lim-Napoles ang lumutang ngayon sa lathala ng Inquirer mula sa salaysay ng whistleblower na si Benhur Luy.
Ito ay sa kabila ng nakabinbing reklamong libelo laban sa pahayagan dahil sa pagbanggit nila sa pangalan ng TV host na si Erwin Tulfo noong mga nakaraang buwan.
Sa panibagong ulat, ilan sa mga bagong nakaladkad na pangalan ay kina Korina Sanchez, Mike Enriquez, Deo Macalma, Rey Pacheco at isang Mon Arroyo.
Kaugnay nito, kanya-kanyang tanggi naman ang mga taong isinasangkot sa isyu.
Ayon kay Sanchez, wala umano itong kinalaman sa mga regalong galing kay Napoles. Kung sinuman anila ang tumanggap ng regalo ay wala na silang kinalaman doon.
Wala pa namang inilalabas na pahayag ang ilang pangalang nababangit sa bagong pagbubunyag.