Dumulog sa National Bureau of Investigation o NBI-Bacolod ang pamilya ng menor de edad na sinasabing apo ng beteranong aktor na si Eddie Garcia upang paimbestigahan ang sinasabing harassment sa bata.
Pumunta sa tanggapan ng NBI ang pamilya ni Jay-R Garcia, 17-anyos, anak ni Mikaela Bilbao-Santander na taga-Negros Occidental kay Erwin Garcia na anak naman ng nasabing aktor.
Nais ng pamilya na ipasiyasat ang sinasabing pag-harass ni Joaquin Bilbao III laban sa menor de edad nitong pamangkin na nangyari noong Mayo 3, 2014 habang nagbabakasyon ang pamilya sa Sipalay City, Negros Occidental kasama ang tatlong anak na babae ng aktres na si Nadia Montenegro.
Hindi idinetalye ni Santander ang nangyaring harassment ngunit sinabing pinagsalitaan umano ng masama ni Bilbao ang bata na nagdulot ng trauma rito.
Handang magsampa ng kasong paglabag sa Republic Act 9262 o Anti-Violence Against Women and Children si Santander laban sa sarili nitong kapatid dahil sa ginawa nito sa kaniyang anak.
Bukas naman ang himpilan sa magiging sagot ni Bilbao sa naturang akusasyon.