Nangangamba na ang mga lokal na opisyal sa North Cotabato dahil sa patuloy pa rin ang pagdating ng mga pasyente na umano'y biktima ng diarrhea outbreak sa ilang mga barangay sa bayan ng Alamada.
Sa akala nila ay matitigil na ang pagdami ng pasyente pero hindi pa rin pala.
Kagabi ay may mga dumarating pa ring mga pasyente sa Alamada Community Hospital na sa huling bilang nila ay umaabot na sa 150.
Ito ay liban pa sa mga biktima na pansamantala munang nasa Dado Elementary School gayundin ang maraming mga pasyente ang nasa Sitio New Leon.
Batay naman sa initial findings ng medical technologist ng ospital, posibo umano sa amoeba ang mahigit sa 50 mga pasyente na kinunan ng specimen.
Pero magsasagawa pa umano ng dagdag pang pagsusuri ang mga doktor at ipapadala sa Danao City ang finding.
Samantala, kinilala ang walong mga nasawi na sina Analiza Landasan, 45-anyos; Usay Mi Catahom, 50-anyos; Asay Dave Tandoy, 8-anyos; Ditan N. Kirat, 5-anyos; Marlyn Pantaan, 14-anyos; Panonpe Mohammad, 4-anyos; Quidang Dimanda, 24-anyos, at Ramla Mangigas, 30-anyos.
Una nang isinailalim sa state of calamity ang bayan ng Alamada dahil sa naturang outbreak.