Nagpapatuloy pa ang imbestigasyon ng Cebu City Disaster Risk Reduction and Management Council laban sa isang contractor ng Pardo Elem. School matapos nahulog sa septic tank ang ina at anak nito.
Ayon kay City Councilor Dave Tumulak, kanyang sinabi na titingnan nila kung nagpabaya ba ang contractor kaugnay sa nangyari na kasabay pa sa pagbubukas ng klase.
Kinilala ang dalawang biktima na sina Eleuteria Ramirez at anak na si Jaymark Ramirez, 7 taong gulang.
Kahapon, hahatid sana ng ginang ang kanyang anak sa classroom nito pero nang matapakan ang takip ng septic tank ay bigla itong nasira.
Nahulog sa loob ng septic tank ang mag-ina at naligo sa dumi ng tao, maliban pa sa natamong sugat.
Matapos nito ay pinaliguan pa ng mga rescue group ang dalawang biktima upang matanggal ang amoy at ang dumi na kumapit sa kanilang katawan.
Napag-alaman na ang septic tank ay nakalagay sa daanan ng mga tao sa loob ng nasabing paaralan.