Nagawang maitabla ngayon ng Defending Champion Miami Heat ang serye sa Game 2 ng NBA Finals matapos na talunin ang San Antonio Spurs sa eskor na 98-96.
Dahil dito 1-1 na ang serye sa Best-of-Seven Series at ang Game 3 ay tutungo na sa teritoryo ng Heat sa Miyerkules.
Masaklap ang pagkatalo ng Spurs dahil abanse pa sila 93-92 may 2:25 minuto ang nalalabi sa fourth quarter matapos na makapagbuslo ng three points si Tony Parker.
Pero sinagot naman ito ng three point shot din ni Chris Bosh para kunin ng Miami ang abanse sa 95-93.
Matapos nito ay hindi na lumingon pa ang Miami para pahiyain ang San Antonio sa harap ng kanilang mga fans sa AT&T Center.
Bago ito, mula sa first quarter hanggang fourth quarter ay nagpalitan nang kalamangan ang magkaribal na team.
Bumawi rin sa kanyang performance ang dating MVP na si LeBron James na nagtala ng 35 points at 10 rebounds na naging usap-usapan noong Game 1 nang nakalipas na Biyernes dahil sa naranasang pulikat bunsod ng init ng arena dahil sa nag-aberyang airconditioning system.
Si Bosh ay tumulong din sa kanyang 18 points.
Samantala sa panig ng Spurs, nanguna naman sa opensa si Parker na may 21 points, habang nauwi naman sa kabiguan ang pagsisikap ni Tim Duncan na may double performance na 18 points at 15 rebounds.