Mahigpit ang babala ng Food and Drugs Administration o FDA sa publiko laban sa pagbebenta at paggamit ng Bangkok Pills, na maaaring makasama sa kalusugan ng mga taong gagamit nito at maaari ring magresulta ng kamatayan.
Ang Bangkok Pills ay una nang natuklasang nagtataglay ng Ephedrine, Bisacodyl, Furosemide, Phentermine at Fenfluramine, na pawang drug substances na may panganib na hatid sa mga consumers.
Kung pagsasama-samahin umano ang mga naturang drug substances ay maaaring maging sanhi ng halusinasyon, paranoia, insomnia, respiratory problems, hypertension, at pag-develop ng heart valve abnormalities, kidney failure at maaari rin umanong makamatay.
Samantala, pinag-iingat din ng FDA ang publiko laban sa pagbili ng isang stem cell health product na ipinagbibili sa internet.
Nilinaw ng FDA na ang “Inner Power Stem Cell Booster” ay hindi rehistrado sa kanilang tanggapan.
Ipinag-utos na rin sa lahat ng FDA inspectors na kumpiskahin ang mga produkto na matutuklasang iniaalok o ipinagbibili sa mga outlet.
Sa isinagawang monitoring, nabatid ng FDA na sa pagbebenta ng produkto ay kini-claim nito na ang produkto ay nakatutulong sa stem cells production sa pamamagitan ng proseso ng mitosis na makatutulong sa reproduction ng platelet, red at white blood cells.
Ngunit walang scientific o clinical study na susuporta sa naturang health at therapeutic claims.
Pinayuhan din nito ang consumers na maging vigilante at kritikal hinggil sa mga online at digital advertisements upang hindi mabiktima ng marketing schemes ng internet fraudsters.
Ang sinomang may reklamo o report hinggil sa mga hindi rehistradong health products o nakaranas ng adverse reactions mula sa paggamit ng mga ito ay maaring mag-email sa info@fda.gov.ph at sa report@fda.gov.ph.