Gugma mo nga wala lami

Adlaw nga ang tanan, nagakalipay. Butlak sang adlaw, nagapangilay. Pispis sa sanga sang kahoy, nagakanta. Mag-swithart sa puno, katam-is sang paghigugma.

Ako ari lang sa kilid sang sapa, naga-isahanon nga nagatan-aw sa nagahinampang nga isda. Kag sa pihak nga pangpang akon nakit-an, dalagita nga naga-isahanon, kag siya masinulub-on.

Kinulba-an ining dughan, kag nakilig pati tul-an sang tion nga iya ako ginyuhuman. Nagpalapit siya sa akon nga wala ko gid mabatyagi, kag digto nagsugod ang amon lab stori.

Amo gali ini? Kon maghigugma ka? Kalimtan ang tanan indi lang siya. Ay sus! Palibot ko nga madulom gulpi lang nagsanag sa kasadya kag nagbana-ag.

Kon ako tawgon niya nga palangga - ay abaw, daw burador sa langit kalit nga nag-landing. Kag siya nagsumpa pina-agi sa singsing agud kuno amon paghigugma no ending.

Siling niya indi niya ako pag-islan kay bu-ot silingon gali dugangan. Ti, gugma namon wala napuslan kay siya gali, playboy man nga paeho sang iban.

Nakit-an ko sila sa plaza perte ka swit, daw si Romeo kag Juliet nga nagadikitanay. Luha ko nagtulo, gusto ko magsinggit pero pilit nga ginapunggan para indi pagsingganon nga tsip.

Ako namangkot sa iya... "sa amon nga duwa sin-o ang imo pili-on?" Sa iya nga sabat ako nagpanalanggit-on. Siya ang iya ginpili, kay gali bantog na siya nga nagabusong. Naglakat ako, dughan ko nagapilisngu-on.

Subong ko nahibalu-an nga gugma niya indi putli. Pareho sang singsing nga ginhatag niya nga naglubad kay gali peke. Kasakit sang dughan akon nabatyagan. Pero anhon ko kay ini bahin sang kapalaran.

Bisan pa wala may gin-agum sa gugma mong wala lami, bisan pa "sori" ang ending sang aton lab istori, bisan pa bulag ang nakasaksi, pabalon ko sa imong... "I Love You!" indi lang pagkalimti.

#ISTORIKITIK