Hambalanon nagikan sa tagipuso-on

Oh, akon nga ginahigugma... karon, yari ako subong nga naga-asoy kag luyag ipalab-ot sa imo ang bug-os nga kamatu-oran nagikan sa akon nga dughan nga nagahigugma na labaw sa tanan. Labi na sa isa ka akit-akit nga dalagita nga pariho mo nga may katam-is nga yuhom sa mala-anghel mo nga nahong.

Una ko pa lang ikaw makit-an, gilayon nabatyagan ko ang pagbag-o sang akon kalibutan. Indi ko mainsyendihan ang akon kaugalingon kag kung nga-a amo nalang ang akon nabatyagan sa tion kon ikaw akon makit-an.

"Nga-a amo sini?" ang hambal sang dughan ko.

Kag sa dalayon ko nga panalawsaw. Nahibalu-an ko gid gilayon ang sabat. Kay gali, yara na ako sa kalibutan sang gugma. Oho, matu-od... kag ikaw ang nagdala sa akon sa kalibutan nga ina. Ikaw, maanyag nga binibini.

Sa tion kon ikaw akon makit-an. Ini lang ang ginasambit sang akon dughan.

"Not only are you very special, but you have a way making us feel special too." ( Wow, english, ah... HAMBURGER naman d'yan! )

Ini ang permi ginahutik sang akon dughan sa akon kaugalingon nga kon ikaw akon makit-an. Bisan kadali lang ang tanan, malipayon na ina sa akon nga tagipuso-on.

Apang, indi ko mabuhat sa akon kaugalingon nga magpalapit sa imo. Tungod, gina-unahan sang kulba ang akon dughan. Nga daw pariho nga may ilaga nga nagadalagan diri sa akon nga dughan. Nagakurog ang akon nga mga teel kag pati na ang akon nga tul-an sa tion nga magbunggu-anay ang aton panulokay. Indi ko mahibalu-an ang akon buhaton.

Kag kun naga-isahanon naman ako, daw ano lang nga pariho sa isa ka buang nga gina-drawing ang mala-anghel mo nga nahong sa hangin. Tungod, sa tagsa kada-segundo nga nagatiyog, ginakahidlawan. Sa tagsa kada-minuto nga nakaligad, ginadalamguhanon. Sa pagtupa sang husto nga oras, ginahandom nga maangkon ang isa ka butang. Ang butang nga yara sa ngalan sang gugma. Ginahandom sang akon dughan nga maangkon ang matam-is mo nga paghigugma- oh, maanyag nga dalagita.

Himu-on ko ang tanan para sa imo. Puwera lang nga lab-uton ko ang adlaw kag bulan kag singiton ang mga bitu-on para lang ihatag sa imo. Ina, indi ko gid mahimo. Bangud, tinikal na ina nga sugilanon.

Apang ang mahimo ko lang gid para sa imo. Amo ang saka-on ang putok-putukan sang kanla-on kag isinggit sa tanan nga...

" GINAHIGUGMA KO IKAW! "

Bisan nga mapina-os na ako sa singgitan. Ina, mahimo ko gid para sa imo.

Matu-od ang akon ginapanghambal sa imo. Indi butig, indi tikal kag ilabi na sa tanan, indi buhat nga sugilanon. Ini tanan matu-od, matu-od nga gikan sa akon dughan nga nagahigugma sa imo.

Kun ano man ang ma-ihatag sang taghana para sa aton. Ina batunon ko sang hugot sa akon dughan.

#ISTORIKITIK