Umabot umano sa 21 incumbent at former senators ang bilang ni dating senador at ngayon ay rehabilitation czar Panfilo Lacson na nakipagtransaksyon kay Janet Lim-Napoles kaugnay ng pork barrel scam.
Ayon kay Lacson, base ito sa listahan na ibinigay sa kanya ni Napoles.
Sa 21 bilang, 12 dito ang incumbent senators, kabilang na ang tatlong matagal nang nababanggit na si Sen. Juan Ponce Enrile, Sen. Jingoy Estrada at Sen. Ramon "Bong" Revilla Jr.
Aabot naman aniya sa 90 kongresista ang mga nakipagtransaksyon kay Napoles.
Base pa rin sa listahang hawak ni Lacson, kabilang dito ang dalawang incumbent cabinet members na dating mga kongresista.
Maingat ngayon si Lacson sa pagsagot sa mga tanong ng media.
Ayaw niyang magbigay ng clue kung sino pa 'yung siyam na incumbent senators na kasama sa listahan.
Pero huwag raw mainip dahil, "willing" siyang magbigay ng testimonya sa Senado kung ipapatawag siya ng Senate blue ribbon committee o kaya naman ay isumite na lamang niya ang hawak niyang dokumento.
Gayunman, magpapaalam pa rin daw siya kay Pangulong Noynoy Aquino dahil sakop siya ng executive previlege ng pangulo.
Pero nakatitiyak umano si Lacson na papayagan siya ng pangulo.
Dagdag pa ni Lacson, kung siya ngayon ay nasa Senado, ipapa-subpoena niya sina Justice Sec. Leila Delima at Napoles para magkaalaman kung sino ang nasa listahan at matapos na ang isyu sa kontrobersyal na "black book" ni Napoles.