Umabot na sa 7 katao ang patay kaugnay sa diarrhea outbreak sa ilang barangay sa Alamada, North Cotabato. Mahigit naman sa 76 mga residente ang nalason dahil sa umano'y kumalat na kemikal at napunta sa kanilang mga inumin sa naturang probinsya.
Mistulang nagkaroon ng diarrhea outbreak sa nasabing lugar dahil dumaranas ng pagtatae, pagsusuka at pagsakit ng tiyan ang mga biktima.
Marami nang isinugod sa Alamada Community Hospital at sa barangay health center.
Ang ibang mga pasyente ay dinala na lamang ng mga kaanak sa mga pagamutan sa Midsayap.
Tinukoy ang mga lugar na apektado maliban sa Barangay Dado ay ang lower Dado, Barangay Tigkawaran, Sitio Ribi, Brgy. Mapurok at iba pa.
Sa inisyal na impormasyon, nag-spray umano ang mga magsasaka ng kemikals sa palayan na ginagamit laban sa mga kulisap.
Pero nitong nakaraang Sabado ng gabi umulan ng malakas na siyang naging dahilan para humalo umano ang gamot sa tubig patungo sa source na inumin ng mga residente.
Maaaring dumaloy umano ang kemikal sa mga balon na ginagamit sa pag-inom at dito na nalason ang mga residente.
Batay naman sa inisyal na imbestigasyon ng municipal health officer na si Dra. Bandala, posibleng ang ginamit na herbicide ang dahilan ng pagkalason ng mga tao.
Ngayong araw ng Martes inaasahang magpapalabas ng opisyal na resulta ang mga otoridad sa isinagawang laboratory test mula sa nakuhang specimen o tubig na nainom ng mga biktima.
Kabilang naman sa mga pangunahing pangangailangan sa ngayon sa lugar ay ang supply ng dextrose para sa mga residente.