ISABELA - Apat ang nasawi kabilang na ang dalawang mga bata, habang apat din ang sugatan sa pagsabog ng granada sa Brgy. Lima-Lima sa bayan ng Isabela, Negros Occidental.
Kinilala ang mga nasawi na sina Karen Tangian, 11-anyos; Mary Michelle Tangian, 5-anyos, at ang kanilang ama na si Melvin Tangian at si Reynaldo Domingo.
Patuloy namang ginagamot sa Western Visayas Regional Hospital sa lungsod ng Bacolod ang mga sugatan na sina Marilou Bustamante Tangian, 39-anyos, ng dalawang bata na namatay, ang mga anak nitong sina Kevin Tangian, 3-anyos; Rica Tangian, 8-anyos, at Melvin Tangian Jr, 10-anyos.
Ayon kay Punong Barangay Ruby Libuna, nangyari ang insidente dakong alas-12:10 ng hatinggabi matapos lasing na pumasok sa bahay ng pamilya Tangian ang suspek na si Domingo na isa rin sa mga namatay na may dalang granada.
Sa panayam kay Marilou, nag-uusap umano ang kanyang asawa at si Domingo sa itaas ng kanilang bahay nang may biglang naghagis ng granada.
Sinasabing tumalon pa si Domingo ngunit nahulog ang dala nitong granada dahilan upang sumabog din na naging dahilan ng kanyang pagkasawi.
Sa impormaasyon na kagagawan ng anak ni Domingo at pamangkin nito ang paghagis ng granada mula sa labas ng bahay na tumakas kaagad matapos ang insidente.
Ayon kay Marilou, posibleng may kinikimkim na galit ang suspek sa kanyang mister matapos kumampi ito sa barangay kagawad na nakaaway ni Domingo noong nakaraang mga araw kaya pinagplanuhan ang pagpaslang sa kanila.