Na-hack ng mga Pinoy hackers ang higit 60 mga websites ng Chinese government at pribadong sites.
Ito'y bilang ganti umano sa pambu-bully ng China sa West Philippine Sea.
Sa operasyong tinaguriang "OpChinaReloaded", nag-insert ng mga pages sa websites ang hackers at nag-iwan ng mensahe.
"China's alleged claim on maritime territories and oppressive poaching can no longer be tolerated. Stand against oppression! It's time to fight back! Say no to China's bullying!" ayon sa mensahe ng hackers.
Nagpakilala ang mga hackers na miyembro ng Anonymous Philippines, Panay Cyber Haxxors, Panay Cyber Army at Phantom Hackers PH.
Maalala na noong 2012 ay naglunsad din ng katulad na cyberattack ang mga Pinoy hackers na ginantihan ng China at na-hack din ang mga website ng gobyerno ng Pilipinas.
Nabatid na lalong tumindi ang tensyon sa pagitan ng China at Pilipinas dahil sa pag-aresto ng Manila sa 11 Chinese poachers at pagtatayo ng Beijing ng airstrip sa Mabini Reef.