Bigo ang Philippine Football Team Azkals sa pangarap na makapasok sa prestihiyosong Asian Cup sa susunod na taon, makaraang tinalo ng Palestine sa finals ng AFC Challenge Cup, sa eskor na 1-0, na ginanap sa National Stadium sa Male, Maldives.
Ang goal ni Ashraf Nu'man Alfawaghra sa ika-58 minuto ng laro ang nagbigay panalo sa Palestine.
Gumawa ng kasaysayan ang Palestine na sa unang pagkakataon ay nakasungkit ng kampeonato sa international tournament at unang beses din na papasok sa Asian Cup.
Karapat-dapat ang Palestine sa naturang panalo matapos ang ipinakitang determinasyon at matibay na depensa.
Sa first half, dominado ng Palestine ang laban kung saan sa ikalawang minuto pa lang ay kaagad itong nakakuha ng corner kick na sinundan ng attempt sa goal bagama't napunta sa kamay ng Philippine goalkeeper na si Roland Mueller.
Muling umatake ang Palestine at sumubok sa goal sa 7th minute na naulit sa 11th minute subalit pawang na-save ni Mueller.
Sa ika-16 minuto, muling napunta sa goalkeeper ng Pilipinas ang attempt ng Palestine.
Nabigyan ng free kick si Patrick Reichelt para sa Pilipinas sa 22nd minute subalit bigo.
Hindi makaatake ang Azkals sa magandang ball passing at compact defense na ipinakita ng Palestine.
Palaging naaagawan ng bola ang Pilipinas habang maganda rin ang ball posession ng Palestine.
Sampung minuto ang nalalabi sa first half, bahagyang agresibo ang Pilipinas kung saan umangat na ang opensa nito.
Nabigyan ng free kick sa 36th minute si Phil Younghusband habang sumubok naman sa goal si Patrick Reichelt sa ika-37 minuto ng laro subalit kapwa bigo.
Pagsapit ng 41st minute, nabigyan ng magandang tiyansa si Younghusband sa goal ngunit mabilis na nasipa ng goalkeeper ng Palestine sanhi upang mapasubsob na lamang sa lupa ang Azkals striker dahil sa frustration.
Sumubok sa goal si Ashraf subalit nasangga ni Mueller pero nadapa ito sanhi upang mabitawan ang bola na mabilis namang narekober ng Palestine para sa follow up attempt.
Ngunit mabilis na nasipa ni Amani Aguinaldo sanhi upang bumagsak din ito.
Sa stoppage time, sinubukan ni Simone Rota na buksan ang scoring para sa Pilipinas ngunit lagpas sa cross bar ang attempt nito.
Nagtapos ang first half na nil-nil o kapwa walang score ang dalawang koponan.
Sa pagsisimula ng second half,nag-iba ang laro ng Azkals kung saan lumakas ang depensa at umigting din ang opensa.
Magkasunod na attempt ang ginawa ni Reichelt ngunit bigo pa rin ang Pilipinas.
Muling nasubok ang depensa ng Pinoy dribblers sa 53rd minute matapos ang goal attempt ng Palestine ngunit tumama sa goal post.
Sinagot naman ito kaagad ng goal attempt ni Rota sa 54th minute ngunit hindi pa rin sinusuwerte.
Nabigyan ng free kick ang Palestine sa 58th minute na siyang nagbigay daan sa kanilang 1-0 advantage.
Bigay todo na ang laban ng Azkals matapos ang goal ng kalaban, subalit bigo na maitala ang equalizer.
Pinalabas ng pitch ng mga game officials ang Azkals manager na si Dan Palami, 20 minuto ang nalalabi sa laro, matapos kinuwestyon ang Yellow Card para kay Reichelt.
Samantala, tatlong minuto bago matapos ang regulation time, isang long ball mula kay Daisuke Sato ang diretso muli sa goalkeeper ng Palestine.
Sa buong laro, walang humpay ang ingay ng mga vuvuzelas at drums ng mga Palestinian fans habang ilang mga mamamayan ng Maldives ang naki-cheer sa Palestine.
Subalit hindi rin nagpahuli ang mga Pinoy na bitbit ang malaking bandila ng Pilipinas.
Sa kabila ng pagkatalo, gumawa pa rin ng kasaysayan ang Azkals sa second place finish nito.
Unang beses itong nakapasok ang Pilipinas sa finals ng Challenge Cup mula sa pangatlong puwesto noong 2012 Challenge Cup.
Maalala na tinalo ng Azkals ang Palestine noong 2012 para sa pangatlong puwesto.
Ito na ang huling taon ng Challenge Cup at wala nang susunod sa 2016, subalit magkakaroon ng expansion ang AFC Asian Cup kung saan mula sa 16 na bansa, gagawin nang 24 ang mga koponan na maghaharap para sa nasabing tournament.