Nagpapatuloy ang malalimang imbestigasyon ng mga otoridad sa tunay na dahilan ng malakas na pagsabog sa isang detachment ng militar sa Masbate na ikinasawi ng dalawang sundalo.
Sa inisyal na imbestigasyon, isang M203 40 mm under-slung grenade launcher ang sumabog sa loob mismo ng sa Kasanggayan Hall sa Tolda Detachment ng Alpha Company ng 22nd Infantry Battalion at 9th Infantry Division, Philippine Army sa Barangay San Juan, Mandaon Masbate.
Kinilala ang mga namatay na sina Civilian Active Auxiliary Roberto Mesa at Quicken Reoyan na kapwa naglilinis ng kanilang mga rifle kung saan nakalagay ang grenade launcher at sa hindi pa matukoy na dahilan ay pumutok ito.
Sugatan din ang 14 pang mga Civilian Active Auxiliary na kasalukuyan naman na nagsasagawa ng briefing malapit sa lugar.
Kasama sa mga sugatan ang kanilang detachment commander na si Sr/sergeant Roger Habetacion y Castarte, 52; Ruel Sachon y Amor, 23; Alvin Mesa y Apuyan, 24; Danilo Dixon y Delos Reyes, 27; Jerome Relox; Antonio Ra y Cabarles, 26; Alvin Zapra y Seachon, 26; Romy Ariola y Bantillo, 34; Deje Cabarles y Roxas, 29; Francis Alava y Peterio, 29; Ramil Adobas; Ranilo Recto y Zaragoza, 27; John Zapra y Seachon, 19; at ang batang si Sammy Reoyan y Comia, 6.
Sa ngayon, nananatili pa rin sa ospital ang mga biktima.
Ayon kay Lt. Col. Medel Aguilar, tagapagsalita ng 9th ID Philippine Army, sinabi nito na naka-formation ang mga sundalo ng Mandaon Army Detachment nang sumabog ang bala ng M203 grenade launcher.
Una rito, agad na dinala ang limang malubhang nasugatan sa Bicol Regional Training and Teaching Hospital o BRTTH sa pamamagitan ng dalawang helicopter habang ang limang iba pa ay nasa Masbate Provincial Hospital.
Subalit makalipas ang ilang oras ay hindi na nakaya pa ng dalawang sundalo ang matinding pinsala sa kanilang katawan at tuluyan nang binawian ng buhay.
Napag-alamang kasing laki ng sardinas ang bala ng naturang grenade launcher at dalawang beses umano itong pumuputok kung kaya malaki ang pinsalang idinulot ng pagsabog.
Iniimbestigahan na ngayon ng Philippine Army kung nagkaroon ng negligence o pagpapabaya sa panig ng mga sundalo.