Inuulan na ngayon ng reklamo ang Albay Power and Energy Corporation o APEC kaugnay sa hindi pa rin masolusyunan na problema sa suplay ng kuryente sa lalawigan.
Sa ngayon, mahigit na sa 30 oras ang nararanasang power blackout sa malaking bahagi ng Albay kabilang na ang Lungsod ng Legazpi at mga bayan ng Sto. Domingo at Manito.
Ayon sa APEC, hindi pa kasi napapalitan ang naging pinsala sa transformer sa may Bitano Substation.
Dahil dito, kabi-kabila na ang batikos mula sa mga member consumer dahil sa halos dalawang araw ng walang maayos na suplay ng kuryente maliban pa sa labis na init ng panahon.
Sa panig naman ng mga negosyante, habang tumatagal ay lalong lumalaki ang kalugiang naitatala mula sa kanilang panig.
Sa loob lamang kasi ng isang araw, aabot na sa P15 million hanggang P17 million ang kalugian sa kanilang mga negosyo.
Sa ngayon, tanging pangako ng Albay Power and Energy Corporation ay ang rotation brownout sa mga susunod pang araw habang hindi pa napapalitan ang nasirang transformer.