Isinailalim na sa imbestigasyon ang lahat ng staff nurse ng pagamutan na naka-duty nang lagyan ng surgical tape ang bibig ng bagong silang na sanggol.
Ito ang naging pahayag ni Dr. Raida Varona, medical director ng Cebu Puericulture Center and Maternity House, Inc. nang humarap sa isang media briefing.
Ayon kay Varona, lahat ng mga staff nurse ay kukunan ng salaysay tungkol sa insidente.
Dagdag pa ni Varona na kakausapin din nila ang magulang ng sanggol na sina Ryan at Jasmine Badocdoc tungkol sa insidente.
Kaugnay nito, inihayag ng pamunuan ng pagamutan na hindi sila makipag-ugnayan sa gagawing fact-finding investigation ng DOH-7 sapagkat nag-imbestiga na sila at ito aniya ang protocol.
Maliban sa DOH-7 nakialam na rin ang lokal na pamahalaan kaugnay sa pangyayari.
Maalala na inireklamo ng isang ina ang nurse ng nasabing pagamutan matapos makita ang kanyang anak sa nursery na nilagyan ng surgical tape ang bibig nito.
Tinanong pa ng ina ang nurse kung bakit niya ito ginawa at ito'y sumagot na malakas umiyak umano ang sanggol.
Sa ngayon umani ng iba't-ibang reaksyon ang insidente sa social networking sites.