Posibleng makaranas na ng pag-ulan sa ika-apat na linggo ng Mayo makaraang mabanaag ng PAGASA ang mga sensyales ng pag-ulan.
Ayon sa PAGASA, karaniwang sa ika-apat na linggo ng Mayo pumapasok ang Habagat o southwest monsoon, na magdadala ng tag-ulan.
Magpapatuloy pa rin ang nararanasang alinsangan ngunit patapos lamang ang pagtatala ng matataas na temperatura, na kadalasan tuwing ikalawa o ikatlong linggo ng Mayo.
Sa pagtatapos ng Mayo ay bahagyang bumababa na ang temperatura at gumaganda na ang panahon.
Pero may mga pagkakataon aniyang umaabot pa sa unang linggo ng Hunyo ang tag-init.
Ngunit batay sa galaw ng mga hangin sa ngayon, nagbabadya na ang tag-ulan ay papalapit na kung saan bumabaling na ang Habagat sa bandang West PH Sea partikular sa itaas, sa Scarborough Shoal.