Isinasapinal na ni Janet Napoles ang ikalawang listahan nito ng mga opisyal ng gobyerno na sangkot sa pork barrel scam.
Sinabi ng abogado ni Napoles na si Atty. Bruce Rivera na sa darating na Miyerkules o Huwebes ay kanilang isusumite ang pangalawang affidavit ng itinuturong mastermind sa PDAF scam.
Ayon sa abogado, mas mahaba at karagdagan pang mga opisyal ang nakalagay sa pangalawang affidavit.
Nang maghalukay daw kasi ng kaniyang records si Napoles ay may mga nakita itong pangalan ng mga nakatransaksyon.
Pero hindi raw ito naisama sa unang affidavit noong nag-usap sila ni Justice Secretary Leila de Lima sa ospital dahil ang records ay nasa kulungan nito sa Fort Sto. Domingo.
Sa pangalawang affidavit na isusumite ay hindi pa kasama ayon kay Atty. Rivera ang mga nakatransaksyon ni Napoles sa Malampaya Fund scam.
Samantala, dumistansiya ang tinaguriang utak sa pork barrel scam na sa Janet Lim-Napoles sa lumabas na listahan ng mga miyembro ng media na nakatanggap din umano ng kickback.
Sinabi ng abogado ni Napoles na si Atty. Bruce Rivera na walang pangalan ng media na nakalagay sa kanilang listahan.
Paglilinaw pa ni Rivera, walang ideya si Napoles sa mga sinasabing payoff para sa mga mediamen.
Ang pangalan ng mga taga-media ay sinasabing galing sa listahan ni Benhur Luy.
Kabilang sa mga nabanggit sina Mike Enriquez, Korina Sanchez, Luchi Cruz Valdes at marami pang iba.
Una nang itinanggi ng naturang mga mamamahayag ang akusasyon.