SILAY CITY - Nakabalik na sa lungsod ng Silay si dating Punong Barangay Noel Ayalin na suspek sa pamamaril at pagpatay sa apat na mga barangay officials at pagkakasugat sa tatlong iba pa habang nasa session sa Barangay Kapitan Ramon noong Marso 6, 2011.
Alas 6:30 kagabi, lumapag sa Bacolod-Silay Airport ang eroplanong sinakyan ni Ayalin kasama ang apat na mga kasapi ng Intelligence Section ng Negros Occidental Police Provincial Office o NOPPO na siyang sumundo sa kaniya sa Iba, Zambales matapos mahuli ng Nueva Ecija Police Provincial Office o NEPPO noong Huwebes ng hapon.
Gumamit pa ng ibang daan palabas ng airport ang pulisya bilang bahagi ng security measures upang maiwasan na dumugin si Ayalin ng mga survivors at pamilya ng mga biktima nito.
Si Ayalin ay idineretso sa Silay Police Station kung saan ito ikukulong hanggang makakuha na ng commitment order sa pag-remit sa kaniya sa Bureau of Jail Management and Penology o BJMP.
Napag-alaman na matapos magawa ang krimen, tumakas si Ayalin at nagtago sa Iba, Zambales kung saan ito namuhay kasama ng kaniyang pamilya at nagbenta ng buko juice na siyang kanilang ikinabubuhay.
Si Ayalin ay Number One Most Wanted Person sa Western Visayas.