BACOLOD CITY - Maraming suspected shabu, mga baril at mga bala ang matagumpay na na-recover ng mga otoridad sa isinagawang buy bust o drug raid operation sa isang compound sa lungsod ng Bacolod kagabi.
Ang operasyon ay inilunsad kasunod nang surveillance ng pulisya laban sa iligal na gawain ng mga suspek.
Batay sa isinagawang inventory, umaabot sa 15 mga sachets ng suspected shabu ang nakuha sa limang bahay sa loob ng Benares Compound sa Brgy. Alijis, lungsod ng Bacolod.
Na-recover din sa raid ang dalawang shotgun, 9mm pistol, maraming magazine ng M16 armalite rifle, mga bala ng carbine, dalawang bala ng rifle grenade, samurai at cash na umaabot sa P32,200 na pinaniniwalaan na kita mula sa pagbebenta ng droga.
Nasa custody na ngayon ng pulisya ang limang kalalakihan at isang babae para sa karagdagang imbestigasyon.
Samantala, may ilan namang nakatakas kasunod nang habulan na nangyari habang isinasagawa ang operasyon.
Ngayong araw ay nakatakdang isailalim sa laboratory examination ang mga suspected shabu na nakumpiska at inaalam din kung may lisensiya ang narekober na mga baril.