Kaalinsabay sa pagdagsa ng mga estudyante ay sinalubong din ng mga katanungan at reklamo ang Department of Education o DepEd kahapon sa unang araw ng klase, Hunyo 2.
Halos lahat sa mga suliraning idinulog ay ang isyu sa pag-transfer ng mga estudyante mula sa pribadong paaralan patungong pampubliko.
Paliwanag ni Deped Asec. Jesus Mateo, bigong makakuha ng Form 137 o patunay ng completion ang mga magulang ng mga bata mula sa private schools dahil may bayarin pa ito.
Aksyon ng DepEd, hihimukin nito ang pribadong paaralan na bigyan pansamantala ng xerox copy ng dokumento para makapasok na ang bata.
Bukod sa transferee, nakatatanggap pa rin ng reklamo ukol sa compulsory contribution sa mga paaralan tulad ng PTA fee, Boy Scout membership at iba pa.
Sa ganitong mga kaso, tinatawagan ng DepEd ang school superintendent para imbestigahan ang reklamo at tiyakin ang paglalatag ng “no collection policy" ngayong pasukan.