Maliban sa Pagasa, inamin ngayon ng pamunuan ng Department of Science and Technology o DOST na marami na ring empleyado ng nasabing ahensiya ang nagresign para mag-abroad.
Ito ang lumabas sa pagdinig Senate Committee on Science and Technology kahapon na pinamumunuan ni Senator Ralph Recto.
Sa nasabing pagdinig, napag-alamang maraming empleyado ang napilitang mag-resign dahil sa mas mataas na sahod sa ibang bansa.
Maliban dito, mangilan-ilan na rin sa mga technical personnel ng Philippine Institute of Volcanology and Seismology o Phivolcs at Advanced Science and Technology Institute o ASTI ay pinipili na ring mag-abroad.
Ayon kay Pagasa Officer-In-Charge Director Vicente Manalo, isa sa mga dahilan kung bakit nagsisialisan ang mga empleyado ay dahil sa delay ng kanilang mga benepisyo.
Dahil dito, iginiit ni Recto na isama sa Pagasa Modernization Bill ang pagbibigay ng 30% hazard pay para sa mga Science and Technology Personnel.
Bago ang pagdinig kahapon, una nang inamin ng Philippine Atmospheric Geophysical and Astronomical Services Administration na 32 sa kanilang mga tauhan ang nag-resign at nag-abroad dahil sa hindi magandang serbisyo ng nasabing ahensiya.