Nauwi sa kontrobersyal na panalo ang pagiging kampeon muli ni Nonito "The Filipino Flash" Donaire matapos siyang ideklara na panalo sa pamamagitan ng fourth round technical decision upang masungkit ang korona ni WBA featherweight "super" Champion Simpiwe "V12" Vetyeka na ginanap sa Macau, China.
Nag-ugat ang lahat nang magkaroon si Donaire ng sugat sa itaas ng kaliwang mata makaraan ang accidental headbutt sa pagtatapos ng round one.
Sa ikalawang round, halatang nasisira ang diskarte ni Donaire dahil sa headbutt at sumargo pa ang dugo sa kanyang sugat dahilan upang tingnan siya ng ring doctor.
Pagsapit ng round three, pinatikim ni Donaire ng kanyang matinding lakas si Vetyeka pero agad naman itong nakarekober.
Sa round four bumawi si Vetyeka at nagpakita ng pagiging agresibo.
Pero nakakita ng magandang pagkakataon ang multi-division champion nang magpakawala ng left hook na siyang nagpabagsak kay Vetyeka.
Dito na binilangan ng referee ang kampeon.
Makalipas ang round four itigil na ang laban dahil sa patuloy na pagdugo ng sugat ni Nonito.
Batay sa patakaran WBA, idinaan sa scorecard ang desisyon kung sino ang panalo.
Lahat ng tatlong judges ay abanse sa score ang Pinoy, 49-46.
Samantala, nasa maayos nang kalagayan si Nonito "The Filipino Flash" Donaire Jr. matapos ang madugong laban dahil sa kaniyang sugat sa may kilay na bunga ng headbutt ni Simpiwe Vetyeka.
Ayon kay Donaire, agad na tiningnan ng doktor ang bagong WBA featherweight champion at tinahi ang nasugatang bahagi ng kilay nito.
Todo pasalamat naman siya sa Diyos dahil naging ligtas siya sa panganib at maayos na natapos ang laban.
Pinuri din nito ang suporta ng fans at hangad umano niya na mabigyan niya ng higit na kasiyahan ang mga tagasuporta sa susunod na laban.
Hindi naman napigilan ng Pinoy boxer na panoorin uli ang laban upang makita niya ng malinaw kung paano niya natamo ang sugat.
Maliban sa headbutt ay nasiko rin umano siya ni Vetyeka, bagay na hindi agad napuna ng referee.
Agad namang nangako ang bagong kampeon na si Donaire na bibigyan niya ng rematch si Vetyeka. Tinawag ni Donaire na "unfinished business" ang kanilang tunggalian na natapos sa hindi inaasahang pangyayari.
Humingi rin ng paumanhin sa mga fans si Donaire dahil sa kinalabasan ng laban.
Paliwanag naman ni Vetyeka kung bakit siya inabot nang pamatay na kaliwa ni Donaire, aniya naging "careless" daw siya.