Nagdulot ng takot at pangamba ngayon sa mga residente na nakatira sa gilid ng Kabacan river ang nakitang malaking buwaya sa mismong hangganan ng Kinudal, Matalam at Brgy. Dagupan sa North Cotabato.
Isang tricycle driver umano ang nakakita ng nasabing buwaya na may habang mahigit sa dalawang metro na ngayon ay pagala-gala sa ilog ng Kabacan.
Matapos na makita ang buwaya, agad itong ini-report sa pulisya ang insidente upang matulungan sila ng Municipal Environment and Natural Resources Office o MENRO na mahanap ang nasabing hayop.
Kaugnay nito, nanawagan naman si MENRO Officer Jerry Laoagan sa publiko na kung sino man ang muling makakita o makahuli sa nasabing buwaya ay agad ipagbigay alam sa kanilang tanggapan.
Kasabay nito, pinag-iingat din ng mga otoridad ang mga residente partikular na ang mga bata na huwag lumalapit sa ilog upang makaiwas sa kapahamakan.