Umakyat na sa 282 ang bilang ng mga nasawi dahil sa Middle East Respiratory Syndrome CoronaVirus o MERS CoV sa Saudi Arabia.
Ito'y kasunod ng ginawang national review ng Saudi hospital mula nang tumama ang nasabing virus noong 2012.
Pero ayon kay Saudi Health Ministry Spokesman Tariq Madani, sa kabila ng biglang paglobo ng death toll na dati ay nasa mahigit 100 lang, kakaunti na lamang daw ang mga bagong kaso ng naturang sakit.
Napag-alaman na sinibak na ang deputy health minister ng Saudi dahil sa mga batikos sa paghawak nito sa krisis.
Ang Saudi Arabia ang sinasabing may pinakamaraming kaso ng MERS-COV.
Ang MERS ay maituturing na mas mapanganib subalit hindi ganoon kadali makahawa kompara sa SARS virus na tumama sa 8,273 katao sa Asya noong 2003 at siyam na porsiyento sa mga ito ay tuluyang namatay.
Kahalintulad din ng SARS, ang MERS ay nakakaimpeksyon sa baga ng isang tao kung saan dumaranas ito ng matinding pag-ubo, hirap sa paghinga at pagkakaroon ng lagnat.
Subalit ang MERS ay nagiging sanhi rin ng rapid kidney failure.
Kamakailan lang nang matukoy na ng international team of scientists ang compound na maaring panlaban sa coronavirus na sanhi ng outbreak ng MERS at SARS.
Ayon sa mga eksperto, ang naturang compound ay tinatawag na K22 na pinipigilan umano ang pagkalat ng virus sa katawan ng tao.
Sinabi ng grupo na pinamumunuan ni Edward Trybala mula sa University of Gothenburg sa Sweden at Volker Thiel mula sa University of Bern, na noong una napansin nila na ang K22 ay may kakayanang labanan ang mahinang uri ng coronavirus na nagdudulot ng trangkaso.
Subalit sa ginawa nilang mga pag-aaral, maari rin umano labanan ng K22 ang mas seryosong strain ng coronavirus kagaya ng MERS at SARS.
Paliwanag ng mga siyentipiko, pinipigilan ng K22 ang pagdami at pagkontrol ng virus sa cell membranes sa human respiratory system na kinakapitan ng coronavirus.
Napag-alaman na hanggang ngayon ay wala pang nahhanap na gamot laban sa MERS virus.