Nais ni Department Interior and Local Government o DILG Secretary Mar Roxas na ngayon pa lamang ay magkaroon na ng komprehensibong disaster plan ang mga local government units o LGUs sa buong bansa.
Ipinag-utos ni Roxas sa lahat ng mga alkalde at gobernador sa buong bansa na mag-umpisa ng maghanda at ilatag ang kanilang disaster plan dahil nalalapit na ang rainy at typhoon season.
Layon ng kalihim na walang casualty na maitala sa panahon ng kalamidad.
Ang direktiba ng kalihim ay kasunod ng ipinalabas na pahayag ng Pagasa na nalalapit na ang panahon ng tag-ulan na inaasahang mag-uumpisa sa ikalawang linggo ng kasalukuyang buwan.
Sinabi ni Roxas na kanyang inaasahan mula sa mga local executives at sa kanilang mga Disaster Response Officers na makabuo ng napakaepektibong alert mechanism para sa kanilang mga constituents na nakatira sa mga danger zones para mabigyan ng sapat na panahon para makalikas ang mga ito.
Pinayuhan din ni Roxas ang mga LGUs na gumamit na ng mga makabagong teknolohiya partikular na may kaugnayan sa weather information applications na siyang gagamitin sa pag-update ng Disaster Risk Reduction and Management plans para sa kani-kanilang mga komunidad.