"Talk of the Province" ngayon sa lungsod ng Cebu ang nagmistulang isang pelikula nang arestuhin ang isang most wanted person kahapon ng umaga sa loob mismo ng simbahan sa bayan ng Ronda, sa lalawigan ng Cebu.
Nadatnan ng mga Ronda PNP ang suspek na si Angelito Tanaid, 39-anyos, sa loob ng simbahan na naka-barong at kasama ang kaniyang kasintahan na kinakasal.
Hindi agad hinuli ng mga pulis ang suspek sapagkat nagsimula na ang kasalan kaya nagsimba muna ang mga ito.
Pagkatapos ng misa, hinintay pa na makapag-picture taking ang buong entourage bago ang pag-aresto.
Nang pinusasan na ang suspek ay nag-iyakan ang mga dumalo sa kasal.
Mapayapang sumama ang suspek sa mga pulis pero nagmakaawa pa ito na makapag-honeymoon muna sana sila ng kaniyang misis.
Pero sinabihan ng mga pulis si Tanaid na wala silang magagawa kundi dalhin ito sa presinto.
Ang suspek ay may standing warrant of arrest sa kasong four counts of murder at matagal nang nagtatago sa batas.