Paglago ng ekonomiya, kabuhayan at karagdagang industriya sa bansa ang pangunahing idudulot kapag naisabatas ang panukalang Film Tourism.
Ito ang isinusulong sa Senado ni Sen. Grace Poe na naglalayong ipakilala ang Pilipinas sa mundo bilang ‘premiere shooting destination’.
Sa kanyang sponsorship speech ng Senate Bill 2272 (Philippine Film and Television Tourism Act of 2014), iginiit nito na maraming ‘spill-over effect’ ang maibibigay nito sa iba’t ibang industriya.
Hindi lamang aniya mga aktor at crew ng isang film outfit ang mabibigyan ng hanapbuhay.
Magmula sa porter sa airport, drivers, waiters sa restaurant, may-ari ng paupahang mga kwarto sa probinsya o kahit mga nagtitinda ng souvenirs at kakanin ay makababahagi sa kaunlarang hatid ng turismo.
Sinabi pa nito na para mas mahikayat ang producers na mag-shoot sa bansa, ipinanukala ni Poe ang pagtatatag ng Philippine Film and Television Tourism Authority o PFTTA.
Ito ay one-stop shop na maaaring kumuha ng permit upang makapagshoot sa iba’t ibang panig ng bansa.
Ang PFTTA rin ang pangunahing magiging tagapangasiwa sa promotion at marketing ng Pilipinas dahil sa paglulunsad ng malawakang kampanya.
Kabilang dito ang pakikilahok sa travel and tourism expos at paglilimbag ng brochures, manuals at websites na nagpapakita ng mga lugar na maaaring itampok sa kanilang pelikula.
Bilang dating chairman ng Movie and Television Review and Classification Board, inilahad pa ng solon na sa pamamagitan ng shooting manual na ito, makikita na agad ng directors at producers ang pisikal na hitsura ng lugar.
Halimbawa ang bilang ng mga burol, taas ng bundok, dami ng ilog o batis, mga gusali na naroon at maging ang kultura ng mga nakatira kung tutugma sa screenplay at script.