BACOLOD CITY - Abot sa P7-Milyon ang halaga ng shabu na nasabat ng Philippine Drug Enforcement Agency o PDEA-6 sa kanilang operasyon na isinagawa sa lungsod ng Bacolod kahapon.
Ito ang pagtaya ni PDEA Region 6 Director Paul Ledesma na siyang nanguna mismo sa operasyon laban sa suspek na si Edgardo Justo, 36-anyos at residente ng Brgy. Granada, Bacolod City.
Nasabat mula kay Justo ang 20 sachets ng pinaghihinalaang shabu na umabot lahat sa isang kilo ang bigat.
Iniligay ang nasabing mga sachets ng droga sa ilalim ng tsinelas na ipinadala mula sa Muntinlupa City sa pamamagitan ng isang courier company.
Una rito nakatanggap ng impormasyon ang PDEA na may shipment umano ng droga mula sa Maynila patungong Bacolod.
Kahapon ay binantayan ng PDEA ang pagkuha ni Justo ng shipment at sinundan hanggang sa parking lot ng isang mall sa Brgy. Singcang airport at doon isinagawa ang operasyon.
Unang nagsagawa ng buy-bust ang mga tauhan ng PDEA at nang nagpositibo ay inaresto na ang suspek.
Nasa custody na ngayon ng PDEA ang nakumpiskang mga droga at kulong naman si Justo na nakatakdang sampahan ng kakukulang kaso.